朋友對你重唔重要？點解呢？

動物世界裏，有些物種我行我素，好似深海裏的鯨魚，天空上的大麻鷹，仲有曠野上美洲豹，佢哋一向都冇乜朋友。但係人類係群體動物，所以多多少少都有幾個三五知己。

有人認為，有冇朋友都冇乜所謂。但係身體最誠實，試問有邊個年齡層唔需要朋友？你可以忍受自己幾多日唔同人溝通？中國文字好犀利。睇番古代個＂朋＂字，本身就係天空上有D雀仔（其實係＇鳳鳥＇）成群地飛的意思。即係話＂朋＂字本身就有三五成群的意思。BB仔出世冇耐就識用對眼睛識朋友，眼仔碌碌，引人注意，阿爸阿媽爺爺嫲嫲公公婆婆姨媽姑姐叔伯甥舅……就成為咗佢哋的人生的第一批朋友。人係好難一個人生活的。你睇：泰山在森林中最好的兩個朋友就係猩猩托托（Terk）與大象丹丹（Tantor）；連成日都黯然銷魂的楊過大俠都要搵鵰兄做朋友才可以闖蕩江湖。朋友最可貴嘅，係不分膚色，毋分種族，甚至係身邊的寵物都可以成為你的老友記。就算係宅在家的男仔、女仔，都會識番幾個線上虛擬世界的”朋友”。咁你話朋友重唔重要？

如果你話自己冇朋友，可能係你搵緊，但仲未搵到你心目中的朋友啦。亞里士多德話，朋友係有三個層次架：

１． 膚淺型朋友：因為利益而結合。（即係成日講得閒飲茶，或者有著數就會一齊嗰種Ｆriend）中國人話呢D叫＂酒肉朋友＂囉。

２． 次等型朋友：因為快樂而結合。（即係吃喝玩樂都會在一起的三五知己，甚至係你青梅竹馬Ｄ朋友）嗱，大雄同伴虎、小夫好明顯係呢D啦。（PS：小霸王技安和牙擦仔阿福呀，咪扮唔知係邊個！）

３． 完美型朋友：因為品德而結合。（即係患難見真情嗰D莫逆之交）大家仲記唔記得管寧點解要同華歆割蓆？

人响唔同時候，唔同階段，唔同心情，需要嘅朋友可能會有少少唔同。到底你想要邊種朋友？你搵緊嘅又係邊種？總之，朋友唔駛多，最緊要係＂夾＂！

撰文: 陳瑞良校長
保良局黃永樹小學校長、香港初等教育研究學會主席

陳瑞良校長

保良局黃永樹小學校長、香港初等教育研究學會主席